ڤه‌ده‌ری گەفەکە ترسا وێ لسەر ساخلەمییێ پترە ژ گەفێن قەلەوی و جگارەکێشانێ
ئەنجامێن ڤەکۆلینەکا نوو یا کو ڤەکۆلەران ئەنجامدای ل زانکۆیا “بریگام یونگ” دیارکر کو بتنێبوون گەفان ل ژیانا مرۆڤی دکەت ھەروەکی قەلەوی یان ژی جگارەکێشان دشێت ببیتە گەفەک لسەر ساخلەمییا مرۆڤی. ھەر ژ بۆ ڤێ یەکێ ڤەکۆلەران رۆناھی ئێخستە سەر وێ یەکێ کو پێدڤییە گرنگییێ ب پەیوەندییێن جڤاکی بدەین ژبەر وێ کارتێکرنا کو دشێ لسەر باشترکرنا ساخلەمییا مرۆڤی بکەت.
ئەگەر تۆ ژ وان کەسان بی یێن کو حەز ژ بتنێبوونێ دکەن، و ل دووراتییەکا جڤاکیدا دژی ژ کەسێن دەوروبەر، شارەزا و بسپۆرێن ساخلەمی ھوشدارییێ ددەنە تە لدۆر ڤێ یەکێ، دگەل وێ راستییێ کو بتنێبوون ئێک ژ نیشاندەرێن خەمۆکییێ یە و نەخوەشییێن دەروونی یێن دی، لێ ڤەکۆلەران ب گەفەکا نوو ھەژمارد یا کو د مەترسییا خوە دا ژ مەترسییا قەلەوییێ و جگارەکێشانێ بووراند لسەر ساخلەمییا مرۆڤی لدووڤ ڤەکۆلینەکا ئەمریکی یا نوو.
ڤەکۆلینێ پشت بەست ب ھندەک خواندنێن پێشتر یێن کو پتر ژ سێ ملیون کەسان بخۆڤە دگریت و پێزانینێن وان لسەر پەیوەندییێن جڤاکی تێدا د دیارکریبوون و کارتێکرنا وێ و گرێدانا وێ ب نەخوەشییان ڤە.
د ئەنجامدا ڤەکۆلەران دا خۆیاکرن کو بتنێبوون کارتێکرنا وێ لسەر ساخلەمییێ گەلەک خرابترە ژ کارتێکرنا جگارەکێشانێ ب ئاستێ 15 جگارەیان رۆژانە، ھەر دیسان دیاربوو کو بتنێبوون فاکتەرەکە د زێدەکرنا رێژەیا مرنێ د کەسێن ژییێ وان ژ 65 ساڵییێ کێمتر، ھەر دیسان وەکھەڤە دگەل کارتێکرنا قەلەوییێ لسەر ساخلەمییێ.
ھەر دیسان ڤەکۆلینێ دا خۆیاکرن کو بارێن مرنێ یێن گرێدای ب بتنێبوونێ و دوورکەفتنا جڤاکی پتر بەلاڤە دناڤ گەنجان دا ژ کەسێن دانعەمر، ڤەکۆلەرێ ئاماژە ب وێ چەندێ ژی دا کو بتنێبوون نە بتنێ رامانا دوورکەفتنا جڤاکی ددەت، ژبەرکو چێدبیت کەسەک تێکەلییێ ژی بکەت لێ ھەر ھەست ب بتنێبوونێ ژی بکەت.
ل دوماھییێ تیما ڤەکۆلەران ھوشداری دان لدۆر وێ یەکێ کو دەلیڤەیا ھەی بتنێبوون ببیتە ئێشەکا ڤەگر د ساڵێن بھێت دا، گونەھییا ڤێ چەندێ ژی د زڤریننە پێشکەفتنا تەکنەلوژییایێ، ھەرچەندە تەکنەلوژییا گەلەک دەرگەھان بۆ تێکەلییێ ژی ڤەدکەت لێ ڤەکۆلەر ئەڤان رێکان ب پەیوەندییێن جڤاکی یێن سڤک و سەرڤە سەرڤە د ھەژمێرن.
ليست هناك تعليقات:
إرسال تعليق